شهقة ورد


جيتك أنا
ياحلوة الحلوات
يللي القمر
سكران بوصالِك
جيتك أنا
ت قطف النهدات
وشهقة وردهن
ليل ع خيالك

إنت النهد
من جسم أرض الرب
الكوّن جمالِك
نوّر تلالِك
نهد الطبيعة
وكرزتو الحمرا
قناديل نور
تشعشع بخالك

ضيعتي ..
زيتونة التاريخ
سِفر الحقيقة بيذكر فعالك
السَيْكون
والشفشاف
والطيّون
وريحة الجنة بعرزالك

الاسكندر الأكبر
غزا العالم
وعرّج ع ديرتنا
تا يقعد قبالِك

بولس إجا
لمّن سمع فيك
روما تركها
وهاااااااام ..
كرمالِك

روما ..
شو روما ؟
شو الكوليزيوم
لو يلمحو نورك
بيقولو : نيالِك

انت ال صنعت المجد
بوجودك
نجمة ونجمة
ينسجوا شالِك
جن الزمان بعشقك
وغنّى
منجيرتو حنت تَ يحلالِك

قالوا : العجايب
سبعة هالأيام
انت العجيبة وما حدا طالِك
عم أختصر حب الوطن فيك
انت الوطن ..
خيرو من سلالِك