منتديات الشامل      


العودة   منتديات الشامل - > القسم الأدبي > فضاء القصة و المسرحية
التسجيل   البحث

فضاء القصة و المسرحية يضم هذا المنتدى كتابات الأعضاء في مجالي، المسرحية، والقصة بكل ضروبها.

مراجل بو علي بقلم الشاعر : سعود الأسدي قصيدة قصصية Ballad باللغة المحكية الفلسطينية

إضافة رد
 
أدوات الموضوع إبحث في الموضوع
قديم 2006-12-25, 08:33   رقم المشاركة : ( 1 )
سعود الأسدي
شاعر الفصحى ورائد الشعر المحكي الفلسطيني الأول

الصورة الرمزية سعود الأسدي





علم الدولة Palestine



سعود الأسدي غير متصل

مراجل بو علي ..قصة شعرية باللغة المحكية الفلسطينيةللشاعر : سعود الأسدي

مراجل بو علي
بقلم الشاعر : سعود الأسدي
قصيدة قصصية Ballad باللغة المحكية الفلسطينية تحكي عن رجل دون كيشوتي يركب فرساً ، ويحمل سيفاً ، وله شاربان ملتويان كذيل عقربة يقتل فتاة في طريق وعري ، ويتركها " دماياها حماياها " ، ويعود إلى بيته ، ويلزم فراشه مرعوباً معقود اللسان لاعتقاده أنه قتل أنسية بشكل جنية أوجنية بشكل إنسية ، ويظل " في خمارها " متهتهاً لا يشرب ولا يأكل ولا يدخن سيجارة حتى يموت !!


إلليلْ مثل الغولْ ،
بِخَوِّف وْسِرُّو غَميقْ ،
حتى الفارسْ يللي عاظَهْر الفرَسْ
والسّيف عا جَنْبو
بِخافْ مِنّو وْبرتعشْ قَلْبو
لَمِّنُّو بِمْشي عَ الطريق بْلا رفيقْ
***
وْمرّه " عمّي حْسين "
كانْ راكب " الزّرْقا "
وْماشي لحالو في عُتُمْ هَالليلْ
عادَرِبْ حِطْمِه * ،
في أرضْ قالوا عنها : مَسْكُونِه *
لا بْليلْ , ولا بِنْهارْ مأمونِه
وْهو الليل ساكِنْ يَمّ ,
وِالبدِر طالعْ تَمَ ,

وِالاّ صوتْ حُرْمِه ،
جاي بينادي ,
من صَفِْحة الوادي :
هيهْ يا عمّي حْسينْ !
يا مْنَسَّب الجِدّينْ !
بالله وَقِّفْ لي , وْرَكِّبْني وَرَاك!
وْصوت عمّي حْسينْ رَدّ وْقالْ :
يا بْنَيِّه مين إنتِ ؟!
وِمْنين جيتيني ؟ ووين كُنْتي ؟
شُو بتعملي بْهالليل لحالِكْ ؟
مَ بتخافي سَبِع يِطْلَعْلِكْ ,
أو غولْ في هَالليل يِغْتالِكْ ؟!
وِالبنتْ لما قرَّبتْ صوبو ,
حَسِّ بْإِشِي بِخَرْفِش بْثوبو
تْلَفَّتْ وَرَاه تْخَيَّلْ شَبَحْ خيمِه
أو جناحْ غيمِه ,
وِالفرسْ لما شَخْرَت وْنَخْرَتْ
قلبو ارتَعَشْ واختشّ *
وْقال: ياما ناسْ من قبلي ,
في الليالي القَمْرَا والعَتْماتْ
صادفوا بْهالوادي جِنِّياتْ
حالاً جَرَدْ سيفو وْعَجَّلْ بالسؤالْ :
" إنتي يا وْلِيِّه !
إنْسِيِّه مثلي وِلاّ جِنْيِّه ؟
جاوبي في الحالْ !
وِالبنتْ حالاً رَدَّت وْقالتْ :
عمّي حسينْ ! يا حيفْ !
كِنَّكْ يَ حسرَه ما بْتِعْرِفني ؟!
وْبِتْفَكِّر بْسيفَكْ تْخَوِّفْني ؟!
ظُبّ سيفَكْ ظُبُّو فِ قْرابُو !
أحسنْ لَحَدّ السيفْ يِرْجَعْ عَ ضَرَّابُو !

وْعمي حْسين لما سِمِعْ هَالرَّدّْ
صاروا شوارْبو يرقصوا عن جَدّْ
مالَكْ ؟ يا عمّي حْسين ؟
ليشْ مني يا ترى خايفْ
كِنَّك يا عمّي حْسينْ مش عارفْ
أو ناسي إنّي بنتْ حارِتْكو,
وْإمّي بَقَتْ يا عمّي جارِتْكو
قُوليلي : مين إنتي ؟! وْمين إمِّكْ ؟!
أحسنْ لاسَيِّحْ عالوَطاه دَمِّكْ .
إمّي بْتعرفْها : فاطمِه العَمْشا
اللي عِشِقْها شَبّ حوراني
وْلما إجَتْ عَ الوَعَرْ تاتْحَطِّبْ
تَرْكَتْ وَرَاها الحَمْلِه وِالبَلْطَه
وْغِلْطَت الغلطَه ،
وراحت خطيفِه عا جبلْ حورانْ .
يومِتْها كُنْتْ طِفْلِه ,
هيكي زْغَيُّورَه ,
وِالناس سَمُّوني آمنِه النَّمْشا
وْلما كْبِرْت وْصُرْت فَرْفُورَه *
هَجّيتْ * من حَكْيِ البشرْ
يللي بَقُوا يقولوا :
" هاي اللي خَطْفَتْ إمّْها
ريت الصّوابِه تْلِمّْها "
وْأجيتْ أسْكُنْ في الوَعَرْ,
أسْتَنَّا إمّي بَلْكي تِرْجَعْ ليْ
وْبَعِدْنيْ لليوم بَسْتَنَّا
وْطول النهار دايرِه مع الرّعيانْ.
وفي الليل في راعي بْهالعُرْزانْ
بَنامْ عِنْدو وعلى الشبّابِه
بِدُق لي وْبَغَنِّي من عندي :
لاجْلِ الإمّ الزهـر نْلِمّْ
وْهَالكلْمـات نْغنّيها
إلدِّنيا إمّ وْعطف الإمّْ
بسوى الدنيا وْما فيها
وِتْشوف عمي حسينْ
أبو عْقالْ مَيّالْ ,
وْشاربينو مثل ذيل العقربِه
لمّا سمِعْ هَالبنت بِتْغَنّي
قالْ : يِمْكِن هاي جِنِّيِّه
أو بنتْ إنسيِّه بَسّ مِنْجَنِّه
وِالفرسْ لمّا شَخْرَت وْنَخْرَتْ
صار قلبو يدق عاشكل الجرسْ
وْقالْ في سِرّو:
فاطمِه العمشا،
راحت خطيفة عاجبل حورانْ
وْآمنِه النَّمشا ،
دارتْ مع الرِّعيانْ في الوديانْ!
خوّاضَه * جابَتْ بنتْ خوّاضَه
وين بدها تْطيرْ ؟
بدي أضربْها وشو ما صار يْصيرْ
وْلما هَزّ السيف قالتْلو:
يا حيفو عمي حسين يا حيفو
بتمرجل وْيسحبْ عليّْ سيفو
ظُبّ حَدّ السيف فِ قْرابو
أحسنْ لحَدّ السيفْ يِرْجَعْ عَ ضَرّابو!
وِتْشوفْ عمّي حسين راجَع فْكارُو:
وَصارْ يِتْهَلْوَسْ
حكايِةْ العمشا الناسْ حِكْيوها
وِكْثير في السّهراتْ عادُوها
لكنْ مع الأيامْ
مثل الحكايا الباقيِه
إلناسْ نِسْيُوها !!
هاي البنِت أكيد جِنِّيِّه
وْلما قرّبْ صوبْها خطوِه
وِالفرس قَحْصَتْ * لَوَرَا
قال: أيش هَالبَلْوِه؟
جِنِّيِّه لكنْها كثيرْحِلْوِه
حامْلِه بْزُنارها منجل حَطَبْ
وبإيدها بَلْطَه بولاد ,
صفرا كإنّو ثِمّْها مسقيْ ذَهَب ,
وْلابْسِه عاجِسِمْها جْلود وْهِرَسْ * ,
وِمْزَنَّرَة بْقُصّيبْ مَجدول بْمَرَسْ,
أيْ وين بَدْها تطيرْ ؟!
بدي أضربْها وشو ما صار يْصير
رَدّ وْسحبْ سيفو
لكنو شاف عْيونها مثل الجمِرْ
وِتْمَهْمَزَتْ * تاتفزّ عاشِكْل النِّمِرْ
وِتْشوف عمّي حسين راجَع حْسابو
وْرَدّ حَدّ السيف لَقْرابو
وْقَلْلَها : يَلْلا !
يللا اركبي يللا !
لِمْعامَلِه يا بنتْ مع ألله.
وْرِكْبَتْ وَرَاه والصوت بالليل انطلقْ:
عن صوت جِنِّيِّه أكيدْ ما بِنْفَرَقْ
" الجازيِه * رِكْبَتْ على ظهر الفرسْ
من حولها الزُّباطْ والعسكر حرسْ "
***
لكن بعد شي شُرْب سيجاره
اطَّلَّعْ وَرَاه عاشعرها المنعوفْ
وْصدرها المكشوف
اللي منو فاح تفاح الـمَجَنّْ *
وِتْشوف عمي حسين كيف انجنّْ
وْهَيِّ عابِطْتُو
بْايدين يللي بشبهو مِذْراه
وْبفخادْها شَدَّتْ عليه
وْبَلَّشَتْ ترهزْ رَهِزْ وِتْغنِّي :
يا بو علي يا عريس !
لافرشْلَكْ بين السّريسْ
يا بو علي يا محبوبْ
لافرشْلَكْ بين الخَرُّوبْ
يا جوزي يا أحلى جوز!
لاكَسِّرْلَكْ جوز ولوزْ
يا بو علي يا حيفَكْ!
تسحب عاالنمشا سيفَكْ!
وِتْشوفو لما شاف إجريْها
واصلات الأرض بيشقوا الترابْ
زي سِكِّةْ عُوْدْ وِبْتُحْرُث كْرابْ *
الضَّيّ بعْيونو انطفى
وِالعقل من راسو اختفى
يَلْلا يابو السِّتينْ
وِبكل قوّتو شَدّ
غَتّ *سيفو بْنُصّ خَصْرِتْها
صرختْ الصّوت ارتجت الوديانْ
جايْ يا غُلْمانْ !*
وِتْشوفها وْهِيْ فاقْدِه أعصابْها
كيف بدها تشلّخو بنيابْها
ومن بعد عَرْكِةْ شي ربع ساعه
زَتّها عاجنبْ وقعتْ عَ الوطاه*
وْمن حَلاة الرّوح مِسْكَتْ بالرّكابْ
وِالفرس جَرَّتْها وَرَاها عَ الترابْ
وْدَمّها يْطَرْشِقْ على الشُّقْفانْ *
وِالميرميِّه الخضرا وِالبِلاّنْ
وِالحزينِه عَ الصخورْ وَقْعَتْ
وْصارَتْ تْباحِصْ مِثِل بَكِّيرِه *
بَكِّيرِه مذبوحَه ,
وْتِشْخَرْ دَمَاياها حمَاياها *
وِبْعِلْمي عمّي حسين هونا كانْ
الفرس طارتْ بيه
وِصْل البلدْ ملموسْ
فاتْ جُوَّا البيت ع العتمِه
وْما حكى وْلا كلْمِه
بردانْ ومن زودْ العَرَقْ غرقانْ
مثل القتيل ارتمى بِفْراشو
وْزَتَّتْ عليه مَرَتُو
بَدَل اللحاف اثنينْ
وْهي تْوَلْوِل وْتُلْطُمْ ,
سألَتو: شو صار ؟! شو صابَكْ ؟!
كِنَّك الليلِه تْزَاعَلِتْ مع حَدَا من صْحابَكْ
وِعْيون عمي حسين هيكي فَنْجَرَتْ * ,
وْرَغْرَغَتْ *,
فأفأ خمس كلمات
فأ.. فاطمِه العمشا
وبنتها النّمشا
وِتْخَرْسَن لْسانو
وْسَكَّت سْنانو
وْظَلّ البعيد بِخْمارْها تا ماتْ *
ماتْ الله يرحمو!
***
وْموت عمي حسين صار حكايْ
والناس شو يِحْكوها رايِحْ جايْ !
قَتْلَتُو الجنِّيِّه!
لكنِ الراعي على الأرغولْ
سهرانْ في أرض الوَعَر بيقولْ :
" الليل مثل الغول
بخوِّف وْسِرّو غميقْ
بِشْبَه عَبَاه سودا
وْجِثِّةْ صبيِّه مْلَفْلَفِه فيها
وْمَرْمِيِّه عاجنب الطريقْ
وِالصَّبيِّه راسْها مقطوعْ
وِالجِثِّة هيك مرميِّه في قَشْلُولْ*
عَالطين والطّيُّون والزعترْ
وِالنرجس بْأنفاسْها مْعَطَّرْ
وِالترابْ اللي غِدِي أحمرْ
بِدْمُوْعها وِبْدَمّْها مَجْبُولْ
بِدْمُوعْها وِبْدَمّْها
مجبول !! "
--------------------------
مفردات :
01درب حطمه: وعرة صخرية .
02 مسكونة : تسكنها الجن .
3. اختش : داخله الخوف والريبة .
4. فرفورة: صبية في مقتبل العمر .
5. هجّيت: هربت .
6. خوّاضة: كناية عن انها فاجرة كأمها .
7. قحصت: رجعت الى الوراء خوفاً أو حذراً .
8. هِرَس: جمع هِرْسة , قطعة من خيش .
9. تمهمزت: تحفزت .
10. الجازية: امراة بطلة ورد اسمها في تغريبة بني هلال( الجازية أم محمد) .
11. تفاح المجن: نبتة لها ثمر مخدّر إذا أُكل أخضر غير ناضج أصاب بالجنون , وإذا نضج وصار أصفركان حلواً لذيذاً ، ويعتبر من المحفّزات للجنس والإخصاب .
12. كراب: أرض محروثة عكسها بور .
13. غتّ: غرز.
14.جاي يا غُلمان : نداء استغاثة وقت الخطر الداهم .
15.الوطاة : الأرض
16. الشقفان : الصخور الضخمة .
017تباحص مثل بكِّيرة : تصارع الموت بيديها ورجليها .
مثل عجلة ، بقرة صغيرة السنّ .
18. فنجر عينيه: فتحهما على وسعهما .
19. رغرغت : امتلات بالدمع .
20. ظل بخمارها : ظل عليلا جرّاءها .
21. قشلول : مجرى ماء شتوي يجف صيفاً .



شـــاهد أيضا:

بطاقات توجيهية للأستاذ من المفتشية العامة للبيداغوجيا.

نماذج تجريبية لشهادة التعليم المتوسط في الفرنسية

مواضيع مقترحة لشهادة التعليم المتوسط في اللغة العربية مع الحلول.

الشامل الملخص لدروس العلوم الطبييعية الرابعة متوسط.

تحميل كتاب رباعيات مولانا جلال الدين الرومي.

محور الدوال الأصلية و حساب التكامل.

تطبيقات و دروس مهمة جدا في الهندسة الفضائية للتحضير للبكالوريا
مذكرات السنة الرابعـــة متوسط بصيغة Word.

نموذج [1] بكالوريا تجريبية للشعب الأدبية مع التصحيح.

درس الدالة الخطية و الدالة التآلفية.

دروس الأنجليزية ملخصة و مشروحة للرابعة متوسط
سلسلة رائعة لمراجعة دروس الرياضيات للرابعة متوسط.

نماذج هامة للبكالوريا في جميع المواد للشعب العلمية
تمرين رائع في الإحتمالات
من روائع إختبارات الرياضيات.

بكالوريات تجريبية بعضها مع التصحيح للأقسام الأدبية في كل المواد.

محاضرات مقياس : الميكانيكا الحيوية - البيوميكانيك - للسنة الثانية
محاظرات الجيدو للسنة أولى - staps
مجتمع البحث وكيفية اختيار العينة
تمارين مع الحلول في المتتاليات للتحضير الجيد للبكالوريا.

قم بزيارة صفحتنا على الفيسبوك
  رد مع اقتباس
قديم 2006-12-25, 14:06   رقم المشاركة : ( 2 )
hafida hadja

::من أعمدة المنتدى::


الصورة الرمزية hafida hadja





علم الدولة Algeria



hafida hadja غير متصل

راااااااااائع

سلمت اليمين شاعرنا الكريم

نشكرك على كل ما تقدمه لنا

لك منا كل التقدير والاحترام

  رد مع اقتباس
قديم 2006-12-25, 18:05   رقم المشاركة : ( 3 )
سعود الأسدي
شاعر الفصحى ورائد الشعر المحكي الفلسطيني الأول

الصورة الرمزية سعود الأسدي





علم الدولة Palestine



سعود الأسدي غير متصل

الأخت الأديبة حفيظة حاجة المحترمة

يسعدْ مساكي والصباحْ
بالورد وزهـــور الأقاحْ
بالشعـر والنغــم الجميلْ
والطيـر يشدو والصداحْ
دمت لنــــــا فـي المنتدى
منشـــان يشملنا النجاح


مع شكري لك وتقديري
سعود الأسدي

  رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع إبحث في الموضوع
إبحث في الموضوع:

البحث المتقدم

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
أنا والمرآة للشاعر : سعود الأسدي سعود الأسدي جواهر الشـــامل (أدباء منتديات الشامل) 11 2008-02-04 18:38
أنت روح كالعطر للشاعر : سعود الأسدي سعود الأسدي جواهر الشـــامل (أدباء منتديات الشامل) 8 2008-02-03 14:04
قصيدة إلى بان في بانياس للشاعر : سعود الأسدي سعود الأسدي جواهر الشـــامل (أدباء منتديات الشامل) 8 2007-07-04 00:10
يا حلوةَ العينين للشاعر : سعود الأسدي سعود الأسدي جواهر الشـــامل (أدباء منتديات الشامل) 7 2006-11-26 12:16
لحبيبتي ورد الصباح للشاعر : سعود الأسدي سعود الأسدي جواهر الشـــامل (أدباء منتديات الشامل) 4 2006-11-22 06:40

RSS 2.0 - XML - HTML - MAP
الساعة الآن 19:15.

 

جميع الحقوق محفوظة © منتديات الشامل 2005-2019
جميع ما ينشر في المنتدى لا يعبر بالضرورة عن رأي المنتدى أو إدارته و إنما يعبر عن وجهة نظر كاتبه
Powered by vBulletin®
Copyright ©2000 - 2019, Jelsoft Enterprises Ltd